Bakkastofa á Bakka

Jólafundurinn okkar Epsilon-systra var haldinn í Bakkastofu á Eyrarbakka. Þar tóku á móti okkur hjónin; Ásta Kristrún húsfreyja Bakkastofu og Valgeir söngvaskáld. Um leið og við komum inn í fallega tvílyfta húsið, sem áður hýsti kaupfélag staðarins, fundum við fyrir persónulegri nálgun og nánd þeirra hjóna.

Við héldum fundinn okkar á neðri hæð hússins og fluttum okkar síðan upp á aðra hæð en þar skenkti frú Ásta okkur heitum kanildrykk sem var rauður á lit vegna sólberjasaftarinnar. Hún sagði okkur undan og ofan af ættarsögu sinni sem hún rakti til „Hússins“ á Eyrarbakka. Valgeir fór með nafnaþulu á 77 jólasveinum sem við átum upp eftir honum með föstum takti.

Humarsúpa og nýbakað brauð var selflutt frá Rauða húsinu og við snæddum hana með góðri lyst á neðri hæð hússins,  þar sem við létum fara vel um okkur. Á meðan skemmtu hjónin okkur í tali og tónum. Valgeir söng nokkur falleg lög og sagði eitthvað skemmtilegt á milli laga – allavega hlógum við mikið – en stundum vorum við líka fyndnar.

Það var ekki annað að heyra á Epsilon-systrum að þær væru himinlifandi með heimsóknina í Bakkahús á Eyrarbakka og þau hjónin létu ánægju sína í ljós með heimsókn okkar.