Deildarfundur í Deltadeild

 Fjórði fundur Deltadeildar var haldinn í leikskólanum Garðaseli á Akranesi 3. mars 2026

Theodóra setti fund og Sigurveig kveikti á kertum. Guðlaug Sverrisdóttir flutti orð til umhugsunar í formi uppistands um starf kennara í grunnskóla. Þar var fjallað skemmtilega um börn og sýn þeirra á raunveruleikann, einlægni þeirra, valkvæða hreyfingu, orkustig frá lægsta til hæsta og hvernig kennari þarf að bregðast við þessu af fagmennsku þó oft reyni mikið á.

Næst á dagskrá var kynning Ingunnar Sveinsdóttur leikskólastjóra á  Garðaseli en Garðasel er heilsuleikskóli sem flutti í nýtt húsnæði 2022 og var komið í fulla nýtingu 2023. Starfsmenn tóku þátt í hönnun leikskólans og voru með í að velja búnað. Leikskólinn var hannaður með það fyrir augum að húsnæðið stýri ekki starfseminni og að leikskólastarfið geti þróast á fjölbreyttan hátt. 

Í starfinu sem heilsuleikskóli eru helstu áherslur: Hreyfing, Næring, Listsköpun, Heilsubók barnsins og Útinám. Til að auka gæði í samskiptum má nefna að unnið hefur verið með Vináttuverkefni Barnaheilla – Blær og Uppeldi til ábyrgðar.

Í skólanum er unnið eftir læsisstefnu Akraness þar sem rauði þráðurinn er öflug málörvun. Áhersla er á lestur og gæða lestrastundir fyrir alla. Unnið er með Tákn með tali og Lubba og málbeinin. Orðaskil, TRAS og Hljóm-2 eru notuð til að finna þau börn sem þurfa aukalega örvun.

Ingunn sagði einnig frá velsóttum, gjaldfrjálsum foreldranámskeiðum sem starfsfólk leikskólans heldur. Námskeiðið heitir Tengjumst í leik-föruneyti barna en áhersla námskeiðsins er á leikinn og að tengjast börnunum og kenna í gegnum leik.

Nánar má fræðast um starfsemi Garðasels á vef skólans https://www.gardasel.is/ 

Undir liðnum Önnur mál var Halldóru afhent rós í tilefni sjötugsafmælis hennar og Guðlaug fékk rós fyrir undirbúning fundarins.Theodóra minnti á boð til DKG í Finnlandi sem sent var í tölvupósti og Ásta minnti á námskeið sem DKG á Íslandi stendur fyrir: THE 5 CHAIRS. A Revolutionary Framework for Behavioural Transformation. 

Næsti fundur 20. apríl er aðalfundur með kosningu nýrrar stjórnar og verður hann haldinn í Borgarnesi.

Áður en við kvöddum gekk Ingunn um með okkur skólann og sýndi okkur húsnæðið. Síðan var borðað á veitingahúsinu Galito og þar dregið í happdrættinu og hlaut Elsa vinninginn að þessu sinni.

 Fréttin er byggð á fundargerð fundarins - ÁE