Fréttir

Alfa-systur áttu mjög notalega samverustund með konum úr Þeta-deild laugardaginn 13. apríl en það er einmitt eitt af markmiðum vetrarins að efla tengslin á milli deilda. Við hittumst á Hótel Marina við Mýrargötuna og byrjuðum á að skoða þetta glæsilega hótel sem búið er að starfa í eitt ár. Síðan hófst fundurinn formlega með því að kveikt var á kertum og síðan snæddum við saman gómsætan brunsj sem var á boðstólum. Meðan á því stóð flutti Bryndís Guðmundsdóttir, Þetasystir, okkur orð til umhugsunar. Þessum ánægjulega fundi lauk síðan með göngferð um bryggjusvæðið í vorblíðunni, bjart var í veðri og fallegt þó blési að norðan. Myndir.

Alfakonur áttu notalegan fund með biskupi Íslands, sr.  Agnesi M. Sigurðardóttur, þann 31. janúar síðastliðinn. Agnes var með hugvekju fyrir okkur sem var ljúft að hlusta á og hvetjandi fyrir okkur  félagskonur. Agnesi eru færðar kærar þakkir fyrir heimsóknina. Myndir frá fundinum.

Fyrsti deildarfundur Alfadeildarinnar á nýja árinu verður haldinn fimmtudaginn 31.janúar, kl. 17:00. Fundurinn verður haldinn á heimili formanns að Sunnuvegi 9, 104 Reykjavík. Dagskrá fundarins: Fundur settur. Kveikt á kertum vináttu, trúmennsku og hjálpsemi. Heiðursgestur fundarins, frú Agnes M. Sigurðardóttir biskup, flytur orð til umhugsunar. Umræður. Kynning á konum sem bornar verða upp vegna inngöngu í félagið. Kosning vegna inntöku nýrra kvenna. Fundi slitið.

Maður er manns gaman og nú er komið að því að við leggjum land undir fót og heimsækjum Þetadeildina á Suðurnesjum. Stjórn Þetadeildarinnar er búin að setja saman spennandi dagskrá og okkur er ekkert að vanbúnaði að leggja af stað :-) Við munum leggja af stað frá Reykjavík kl. 17, fimmtudaginn 1. nóvember. Ekki er ákveðið ennþá hvort farið verður á einkabílum eða í rútu en það skipulag er í vinnslu.  Myndir

Næsti fundur hjá Alfa- deild verður fimmtudaginn 1. nóvember en þá ætlum við að heimsækja systur okkar á Suðurnesjum, Þeta-deild.

Nýja stjórnin er full bjartsýni hvað veturinn varðar. Okkur langar að hafa "listir - samskipti - tengsl" sem leiðarljós í stjórnartíð okkar. Þetta þykja okkur vel valin leiðarljós ekki síst í ljósi þess sem kom fram og fjallað var um í New York í sumar. Innihaldsrík og gefandi samskipti, innan deildarinnar sem og við aðrar deildir, verða seint fullmetin. Munið fyrsta fundinn þriðjudaginn 2. október kl. 17:00 að Sunnuvegi 9. Þá verður notaleg samvera Alfakvenna ásamt inntöku nýrra félaga. Sjá dagskrá fram að áramótum undir hlekknum vetrarstarfið.

Vorþing DKG var haldið í Þjóðmenningarhúsinu laugardaginn 29. apríl og þangað fjölmenntu Alfa systur því 23 félgskonur úr deildinni mættu á þingið. Þær áttu mjög góðan dag með öðrum systrum DKG og nutu dagskrárinnar í hvívetna. Sjá myndir.

Fyrsti fundur nýs árs var 9. febrúar haldinn í Vesturgarði við Hjarðarhaga. Þangað komu nemendur og kennarar úr Vogaskóla og sögðu frá hvernig þau nýta lesbrettin (kindle) í námi og kennslu. Undir liðnum önnur mál var inntaka nýrra félaga rædd og landsambandsforseti, Sigríður Ragna, fór yfir ýmiss mál. Sjá myndir frá fundinum.

Fyrsti fundur verður haldinn í Gerðubergi þann 3. október kl. 17.00. Dagskrá: Formaður setur fundinn, kveikt á kertum. Orð til umhugsunar : Sigrún Klara Hannesdóttir og Sjöfn Sigurbjörnsdóttir. Alþjóðaráðstefnan á næsta ári í New York kynnt: Sigríður Ragna Sigurðardóttir, forseti landssambandsins. Bókmenntaborgin Reykjavík kynnt : Auður Rán Þorgeirsdóttir og Kristín Viðarsdóttir

Lokafundur vetrarins verður haldinn fimmtudaginn 7. apríl kl. 17:00 að Skildinganesi 48 á heimili Sigríðar Rögnu.Sérstakur gestur fundarins er kanadíski sendiherrann, Alan Bones, en hann mun fræða okkur um menntastefnu Kanada og svara fyrirspurnum. Eins og þið eflaust allar vitið hefur Kanada komið vel út úr Pisakönnunum.   Við ætlum að gera okkur glaðan dag í tilefni þess að þetta er lokafundur vetrarins og á boðstólum verða léttar veitingar. Vonast er eftir að Alfa- konur fjölmenni.