4. fundur

Auður Torfadóttir, formaður Eta-deildar, setti fundinn og bauð fundargesti velkomna. Hún las síðan upp bréf frá Guðlaugu Sjöfn Jónsdóttur sem hefur sagt skilið við hópinn og ræddi í framhaldi af lestrinum ýmsar umræður sem hafa verið í gangi um tilgang starfs samtakann. Auður minnti einnig á viðburði sem framundan eru hjá DKG, svo sem vorþing á Ísafirði þann 10. maí n.k. og sumarþing í Minneapolis. Auður ræddi einnig reglur í tengslum við inntöku nýrra félagskvenna og kynnti í kjölfarið 4 konur sem deildarkonur hafa mælt með að verði boðið í deildina. Ákveðið var að senda þessum konum bréf og bjóða þeim á fund. Að þessu loknu tók Guðrún Geirsdóttir við stjórn fundarins.

Orð til umhugsunar flutti Ingibjörg Símonardóttir. Hún lagði áherslu á mikilvægi þess að frumkvæði nemenda fengi að njóta sín í skólastarfinu og las upp ljóð sem lýsir á mjög myndrænan hátt hvernig hægt er að kæfa frumkvæði hins frjóa barnsheila með of mikilli miðstýringu kennara. 

 

Gestur fundarins var Ólöf Ýrr Atladóttir, ferðamálastjóri.  Hún hélt erindi sem hún nefndi: Auðlindir íslenskrar ferðaþjónustu. Í erindi Ólafar kom fram að ferðaþjónustan á Íslandi nær yfir mjög vítt svið og erfitt er að tala um ferðamál sem eina afmarkaða grein. Hún greindi frá því að erlendum ferðamönnum hefur fjölgað mjög hér á landi á undanförnum árum og árið 2012 skilaði ferðaþjónustan meiri erlendum gjaldeyri en aðrar atvinnugreinar. Ólöf sagði að helstu stefnumál innan ferðamála væru að auka arðsemi greinarinnar, skapa fjölbreytt störf á ársgrundvelli, byggja upp áfangastaði vítt og breytt um landið og lengja ferðamannatímabilið. Ólöf benti á að skortur er á rannsóknum á sviði ferðaþjónustu hér á landi, framtíðarsýn vantar, svo og stefnumótun. Hún sagði að fagmennska og metnaður yrðu að vera í fyrirrúmi og menntun og þjálfun starfsmanna mikilvæg. Ólöf kynnti einnig fyrir okkur Vakann, sem er gæða- og umhverfiskerfi ferðaþjónustunnar. 

Að loknu erindi Ólafar gafst tími fyrir umræður og fyrirspurnir. Var henni þakkað fyrir einstaklega áhugavert erindi með rauðri rós að hætti samtakanna.  

Fundinn skipulögðu: Guðrún Geirsdóttir, Ingibjörg Símonardóttir, Ósa Knútsdóttir og Stefanía Valdís Stefánsdóttir. 

Anna Sigríður, Anna Magnea, Auður, Bryndís, Brynhildur, Eyrún, Guðrún Geirs, Ingibjörg Símonar, Jóhanna Einars, Kristín Guðmunds, Kristín Ólafs, Ósa, Soffía, Stefanía og Þórunn Blöndal. Gestur: Ólöf Ýrr Atladóttir.

Fundi var slitið kl. 13.00.

Fundargerð ritaði: Ósa Knútsdóttir.