3. fundur

Jólafundur Kappadeildar var haldinn sameiginlega með Etadeildinni þann 1. desember 2014  í notalegum húsakynnum í Hannesarholti við Grundarstíg, kl. 18.00 – 21.00. 

Valgerður Magnúsdóttir Kappakona flutti orð til umhugsunar.  Hún velti því upp hvort jólin kæmu í IKEA. Hún las úr bókinni  „Fátækt fólk“ lýsingu á undirbúningi jólanna á íslensku sveitaheimili fyrir 100 árum. Sagði svo frá eigin reynslu, mótþróanum sem kemur upp í henni þegar hún heyrir fyrstu auglýsingarnar um jólin. Hvernig hún finnur fyrir mikilli pressu frá því snemma á haustin um að kaupa alla skapaða hluti og gera allt milli himins og jarðar af því að jólin séu að koma. Þá reynir á streitustjórnun Valgerðar sálfræðings. Hún glímir við hugsanir sínar með þeim faglegustu aðferðum sem hún hefur yfir að ráða, jákvæðri sálfræði og núvitund. Hún forgangsraðar og reynir að losa sig undan „valdi ættanna“, þ.e. því að það eigi að gera þetta og hitt. Svo sagði hún  lítillega frá því sem er á forgangslistanum og svo bakar hún glöð sína einu smákökusort þegar hana langar til. Hún klikti út með því að segja að enginn skyldi halda að þetta væri henni átakalaust.

Margar Kappa- og Etasystur könnuðust vel við þetta vald ættanna og klöppuðu Valgerði lof í lófa. 

Þá kynnti Kristín Steinsdóttir bókina sína Vonarlandið og las valda kafla.  Mikill áhugi var á bókinn og keyptu fjölmargar hana  af Kristínu.

Þá voru reiddir fram dýrindis jólaplattar með fjölbreyttum smáréttum sem konur gæddu sér á. 

Fundi var slitið um kl. 21.00  þegar formaður Kappadeildar færði þeim sem höfðu lagt af mörkum til fundarins, rós sem tákn um þakklæti og slökkti á kertum vináttu, trúmennsku og hjálpsemi.

Anna Kristín Sigurðardóttir skráði