2024-2025

Fyrsti fundur

Fundurinn var haldinn 2.október 2024 kl. 18.00 – 20.00, í húsnæði Góða hirðisins. 15 félagskonur mættu á fundinn, tveir gestir (væntanlegar félagskonur) og fyrirlesari kvöldsins Freyr Eyjólfsson Verkefnastjóri fræðslu og kynninga hjá Sorpu. 

1. Stjórn deildarinnar sá um fundinn og kveikti Ólöf Helga á kertum vináttu, trúmennsku og hjálpsemi.

2. Ólöf Helga var með Orð til umhugsunar og sagði m.a. frá stofnun Rauða Kross deildar í Svíþjóð. Síðan ræddi hún um hvað það væri gott að njóta náttúrunnar í rysjóttu veðri og fór með vísu, um berin blá.

3. Hafdís Sigurgeirsdóttir gjaldkeri lagði fram rekstrarreikning og efnahagsreikning ETA deildar Delta Kappa Gamma fyrir tímabilið 1.7.2022 – 30.6.2023 og fyrir tímabilið 1.7.2023 – 30.6.2024. Reikningarnir voru samþykktir.

4. Freyr ræddi um Hringrásarhagkerfið sem er hagkerfi þar sem leitast er við að koma í veg fyrir að auðlindir verði að úrgangi með áherslum sem tryggja að hægt sé að viðhalda verðmætum auðlinda eins lengi og mögulegt er. Markmiðið er að lágmarka auðlindanotkun og þar með úrgangsmyndun. Helstu aðgerðir sem tryggja að auðlindum sé haldið í hagkerfinu eru að deila, gera við, endurnota, endurframleiða, og endurvinna. Í erindinu fjallaði hann um hvað fælist í þessum aðgerðum. Með því að deila næst fram skilvirkari neysla. Sameign vara og auðlinda (deilibílar, bókasöfn, og samakstur) gerir notkun auðlinda skilvirkari og dregur úr umhverfisáhrifum.  Með því að gera við eykst líftími vara. Með að nota vörur áfram í óbreyttu formi til dæmis með að skipta um eigendur, er hægt að koma í veg fyrir framleiðslu á nýjum vörum. Hægt er að endurframleiða svo sem raftæki samkvæmt forskrift framleiðandans með að sameina endurnotkun, viðgerðir og nýja íhluti. Efni eins og málma, pappír, gler og plast er hægt að endurvinna og nýta sem endurheimt hráefni í stað nýrra.

5. Mjög góður rómur var var gerður að erindi Freys og spunnust mjög líflegar og fróðlegar umræður um það. Jafnhliða gæddu fundarkonur sér á snittum og sætmeti.

6. Fundi var slitið kl. 20:00. 

 Annar fundur

Fundurinn var haldinn í Hljóðbergi í Hannesarholti 12.11.2024 kl. 18:00-20:00.

21 félagskona mætti á fundinn. Gestir fundarins voru: Ingvar Sigurgeirsson, Nanna Kristín Christiansen og Hanna Rún Eiríksdóttir. Réttir kvöldsins, fiskur eða grænmetisréttur voru bornir fram eftir fyrsta erindi.

1. Ólöf Helga Þór, formaður, setti fundinn og kveikti á kertum vináttu, trúmennsku og hjálpsemi.

2.  Anna Magnea Hreinsdóttir stjórnaði fundi.

3. Bryndís Guðmundsdóttir var með Orð til umhugsunar. Hún minntist þess að hafa orðið fyrir miklum áhrifum af erindi Gunnars Sveins Magnússonar, sjálfbærnistjóra hjá Deloitte, sem fræddi okkur síðastliðið haust um allar þær áskoranir sem við stöndum frammi fyrir sem tengjast sjálfbærum lífsstíl. Bryndís sagði átakið Nægjusamur nóvember sem nú er í gangi einmitt vera til þess að vekja fólk til umhugsunar um neysluvenjur sínar og hvetja það til aukinnar nægjusemi með sjálfbærni í huga. Mikilvægt sé að átta sig á gerviþörfum og forðast græðgi. Hún vitnaði svo í orð Gunnars Hersveins heimspekings sem leggur áherslu á það að hver einstaklingur skoði sín gildi og spyrji sig hvað raunverulega leiði til lífshamingju. Hann telur að nægjusemi og hófsemi séu lykilþættir í því að finna þessa lífshamingju og að búa í sátt við samfélagið og umhverfið.

4. Ingvar Sigurgeirsson prófessor og verkefnisstjóri Íslensku menntaverðlaunanna kynnti verðlaunin. Hann fór yfir markmið verðlaunanna sem eru að viðurkenna og heiðra framúrskarandi starf og nýsköpun á sviði menntamála. Verðlaunin eru veitt árlega til einstaklinga, hópa eða stofnana sem uppfylla þessi markmið. Hann lagði áherslu á það að verðlaunin hafi hvetjandi áhrif á skólastarf og stuðli að faglegri þróun innan íslenska menntakerfisins og sýndi glærur af verðlaunaverkefnum nokkurra skóla. Verðlaunin voru fyrst veitt árið 2005 að frumkvæði Ólafs Ragnars Grímssonar forseta  Íslands með stuðningi sparisjóðanna. Eftir bankahrunið varð hlé á veitingu þeirra því ekki fannst bakhjarl en Lilja Dögg Alfreðsdóttir ráðuneytisstjóri endurvakti þau og kom forsetaembættið þá til samstarfs.  

5. Hanna Rún Eiríksdóttir, kennari við Klettaskóla og aðjúnkt við Háskóla Íslands, fékk Íslensku menntaverðlaunin 2021, fyrir framúrskarandi kennslu nemenda með fötlun, meðal annars fyrir að þróa nýjar leiðir til tjáskipta. Tjáskipti eru hennar hjartans mál og fór hún á bólakaf í að leita að tæknilausnum til að ná sambandi við nemendur sína þrátt fyrir að telja sig ekki sterka á því sviði. Í samstarfi við ÖMÍ og fyrirtækið Tobiidynavox lærði hún að kenna nemendum sínum að nota augnstýribúnað til samskipta með samskiptatöflum sem hún hannaði eða staðfærði. Hanna Rún sagði kraftaverkasögur og lýsti hughrifum sínum af því þegar nemendur fóru að svara áreiti hennar og spurningum og einlægri gleði barnanna þegar þau áttuðu sig á því að þau gætu leikið sér í tækinu og sagt hug sinn. Hanna Rún varð alvarlega veik á þessu þróunartímabili og fór í veikindaleyfi en hélt áfram að afla sér þekkingar þegar stund var á milli stríða. Hún kennir nú fjölbreyttar tjáskiptaleiðir við deild menntunar og margbreytileika við HÍ. Hún sagðist afar stolt og þakklát fyrir þessa viðurkenningu sem Íslensku menntaverðlaunin eru.

6. Nanna Kristín Christiansen fékk Íslensku menntaverðlaunin sama ár og Hanna Rún, 2021, fyrir framúrskarandi störf við þróun og innleiðingu leiðsagnarnáms sem kennsluaðferðar. Leiðsagnarmat er byggt á ítarlegum niðurstöðum úr rannsóknum á beitingu aðferðarinnar við breska skóla. Stuðst er við aðferðarfræði Shirley Clarke. Fyrstu árin voru nokkrir skólar að kynna sér og nota leiðsagnarmat með aðstoð Nönnu Kristínar og Eddu Kjartansdóttur, aðstoðarskólastjóra og John Morris fyrirlesara sem fenginn var frá Bretlandi. Í kjölfar 50 fræðslufunda sem Nanna Kristín hélt 2017 til 2019 fyrir skólastjóra 25 grunnskóla fengu þeir umbeðna símenntun fyrir kennara sína með námskeiðum sem voru gríðarlega vel sótt og fylltu áhugasamir kennarar alla sali. Það sem var áhrifamest að mati Nönnu Kristínar var að kennarar sóttu námskeiðin að eigin frumkvæði. Nanna Kristín er höfundur nokkurra bóka um leiðsagnarnám sem kaupa má á netinu. Árið 2020 var ákveðið að fjórir grunnskólar yrðu þekkingarskólar sem veittu öðrum skólum ráðgjöf og komust færri skólar að en óskuðu þess.

Mjög góður rómur var gerður að erindunum og mörgum spurningum svarað. Ingvar hvatti félagskonur að horfa á afar vel unninn þátt RÚV um afhendingu Íslensku menntaverðlaunanna.

7. Fundi slitið kl. 20:00.

Þriðji fundur

Fundur var haldinn 2. desember 2024 í Ölduselsskóla kl. 18:00-20:15. 19 konur mættu á fundinn sem var með hefðbundinni jóladagskrá.

Eyrún Gísladóttir spilaði á harmonikkuna meðan fundargestir tíndust í hús, síðan voru sungin nokkur jólalög.

1.  Ólöf Helga Þór setti fund og kveikti á kertunum þremur.

2.  Eyrún Gísladóttir stjórnaði fundi og fór yfir dagskrána.

3.  Hulda Karen Daníelsdóttir var með Orð til umhugsunar og lagði út af bókartitlinum Veisla í farangrinum eftir Hemmingway. Hún sagði frá því þegar hún flutti til Kanada og í farangrinum var hún með íslenskar jólahefðir m.a. að baka nokkrar smákökusortir og að hreingera allt hátt og lágt. Hún flutti einnig með sér þá íslensku hefð að gefa börnunum gjafir í skóinn á aðventunni, og það varð til þess að gistinóttum vina barnanna hennar fjölgaði á aðventunni. Síðast en ekki síst að allir væru prúðbúnir kl. 18:00 á aðfangadag. Í Kanada er ekki lagt upp úr aðfangadagskvöldi eins og hér hjá okkur, jóladagur er aðaldagurinn þar sem gjafirnar eru teknar upp.

4.  Margrét Tryggvadóttir, rithöfundur mætti og kynnti nýjustu bók sína Einar Anna og safnið sem var bannað börnum. Hún sagði líka frá öðrum bókum sínum, Kjarval, maðurinn sem fór sínar eigin leiðir, og Íslensk myndlist, og fólkið sem ruddi brautina. Margrét var með kynningu á bókinni um Einar og Önnu. Hún skrifar þessar bækur fyrir börn til að kynna fyrir þeim listir, en telur að best fari á að fullorðnir lesi með börnunum til að vekja hjá þeim áhuga. Fullorðnir hafa einnig gott af lestrinum þar sem margur fróðleikur er falinn á síðum bókarinnar sem ekki er á allra vitorði. Miklar og góðar umræður sköpuðust eftir kynninguna.

5.  Þegar kynningunni lauk var boðið upp á gómsætt smurbrauð og eftirrétt, sem útbúið var af Erni Arnarsyni, matreiðslumanni Ölduselsskóla.

6.  Hélt umræðan um bók Margrétar áfram og að lokum voru sungin jólalög.

7.  Fundinum lauk kl. 20:15 og allir fóru heim með gleði í hjarta.

Fjórði fundur

Fundurinn er haldinn 22. janúar í Miðstöð menntunar og skólaþjónustu kl. 18:00-20:00. Mættar eru 24 konur. Fundarritun: Guðrún Hrefna Guðmundsdóttir.

1. Ólöf Helga Þór formaður Etadeildar setur fund, kveikir á kertum og stýrir nafnakalli.

2. Auður Torfadóttir stýrði fundi

3. Ragnheiður Jóna Jónsdóttir flytur orð til umhugsunar með yfirskriftinni: Höfum við gengið til góðs? Hún talaði út frá því að Oksana Shabatura ætlaði að tala við okkur í dag  og hversu margt hefði breyst frá því að Ragnheiður hefði í doktorsritgerð sinni fjallað um það hvernig við Íslendingar gætum tekið betur á móti erlendu fólki. Þá, í upphafi 10. áratugarins hefðu útlendingar á Íslandi verið um 10 þúsund, nú væru þeir um fimmtungur þjóðarinnar. Í doktorsritgerðinni spurði Ragnheiður: Þurfa kennarar sérstaka þjálfun til að búa þá undir kennslustarf í fjölmenningarsamfélagi framtíðarinnar? Ragnheiður fagnar því að Oksana Shabatura ætli í dag að kynna fyrir okkur starf sitt sem brúarsmiður fyrir úkraínsk börn í íslensku skólakerfi.

4. Oksana Shabatura flytur erindi dagsins. Erindið heitir: Brú milli landa. Um starf okkar brúarsmiða. Erlendum nemendum fjölgar ört hér á landi. Þeir koma úr mismunandi aðstæðum. Börnin kunna ekki öll ensku, eru því hjálparlaus og vantar brúarsmið sem talar móðurmál barnsins. Brúarsmiðir hitta fjölskyldur er þær koma til landsins. Það vantar oft túlka fyrir fjölskyldurnar, þeir sem koma að túlka eru oft með fátæklegan orðaforða, því eru brúarsmiðir mikilvægir. Skilja þarf þær aðstæður sem börnin koma frá. Í dag eru til arabískur, flippísku mælandi, úkraínskur og pólskur brúarsmiður. Hlutverk þeirra er að byggja brú milli landa – útskýra hver menningarmunurinn er milli heimalandsins og hins nýja lands, Íslands.

Oksana segir okkur frá Úkraínu, lífsháttum fólks og skólakerfinu. Og hvernig stríðið hefur höggvið skarð í samfélag þar sem áður bjuggu 43 milljón manns en núna aðeins á bilinu 28-34 milljónir. Dæmigerðir matarréttir eru: Borsch (rauðrófusúpa), varenyky (deighálfmánar með fyllingu), holodec (sulta úr svínakjöti), deruny (grænmetisbuff) og salo (svínafita). Þjóðbúningurinn er vyshyvanka eða blússa, útsaumuð, bæði á stráka og stelpur.

5. Á fundinum var boðið upp á úkraínskan mat, súpu og köku í eftirrétt, matreitt af Oksana Shabatura. ETA-konur nutu veitinganna sem voru lostæti.

6. Konur í hópi 3 sáu um undirbúning fundarins: Auður Torfadóttir, Guðrún Hrefna Guðmundsdóttir, Oksana Shabatura, Ragnheiður Jóna Jónsdóttir, Sif Vígþórsdóttir og Sigríður Ólafsdóttir.

Fimmti fundur

Fundurinn var haldinn 12. mars í Kringlukránni. Mættar voru 24 konur á þennan slæðufund, nokkuð margar konur komu með slæðu og höfðu gaman af því. Fundarritari var Ragnhildur Björg Konráðsdóttir og fundarstjóri Magnea Ingólfsdóttir.

1.  Ólöf Helga Þór, formaður kveikti á kertunum þremur skv. venju. Hún upplýsti að síðasti fundur vetrarins yrði 28. apríl. Hann væri í höndum stjórnar og reiknað væri með því að hann yrði haldinn í Kringlukránni. Þetta yrði móttökufundur þar sem teknar yrðu inn 4 – 5 konur. Ólöf Helga ætlar að senda kynningar á þeim fljótlega.

2.  Á þessu ári eiga DKG samtökin 50 ára afmæli. DKG þing verður haldið 10. og 11. maí (laugardag og sunnudag). Þingið verður sett 9:30 í Salnum í Kópavogi og svo matur um kvöldið á Hótel Grand. Ólöf hvatti fundarkonur til að mæta. Heimsforseti DKG verður gestur á fundinum. Dagskráin er áhugaverð og skemmtileg.

3.  Framkvæmdaráð hafði áhuga á að finna eitthvert samfélagsverkefni. Ólöf sendi póst á aðrar deildir til að hvetja til samvinnu um gott verkefni. Allir virtust áhugasamir, en ekkert kom út úr því. Þjóðin er að eldast, einn fjórði af þjóðinni er orðinn 65 ára og eldri. Það gæti verið ráð að stofna hugmyndabanka þar sem hægt væri að búa til vettvang um slíkt verkefni til að kynnast konum í öðrum deildum. Rætt var um að nýta betur mannauðinn, þann hóp sem er ern en er kominn á eftirlaunaaldur.

4. Næsti fundur undir stjórn stjórnar Eta deildar tekur umræðuna um möguleg samfélagsverkefni sem konur í DKG gætu tekið þátt í. Eftir langar og skemmtilegar umræður, þá var komið að eiginlegri dagskrá fundarins.

5.  Magnea Ingólfsdóttir fundarstjóri tók við stjórninni og í framhaldinu var Björg Kristjánsdóttir með Orð til umhugsunar og fjallaði um núvitund og samkennd og mikilvægi þessara þátta í nútíma samfélagi. Í framhaldinu fjallaði Björk Jónsdóttir um Brúaskóla yfir tímabilið 2003-2025. Þar fjallaði hún um markmið og hlutverk skólans og þann mikilvæga þátt að nemendur/börn gætu farið úr sínu umhverfi náð áttum og komið svo aftur til baka til síns skóla og haldið áfram þar.

6. Matur var borinn fram 19:20 og var boðið upp á : Kjúklingabringu, fyllta með spínati og ricotta osti, villisveppasósu, kartöflumús, brokkolini, sýrðum lauk og tapenade og fisk kvöldsins ferskastan hverju sinni að hætti kokksins. Verðinu var stillt á hóf eða 4.750 krónur (15% afsláttur).

7. Fundinum lauk síðan með því að Björk Jónsdóttur var færð rós og slökkt var á kertum.

Sjötti fundur

Fundurinn var haldinn 28.4.2025 kl. 18:00-20:00 í Kringlukránni. 15 félagskonur og ein kona sem tekin var í félagið mættu á fundinn. Stjórnin sá um fundinn og var formaður fundarstjóri.

1. Ólöf Helga Þór, formaður, setti fundinn og kveikti á kertum vináttu, trúmennsku og hjálpsemi.

2. Ásta Lárusdóttir, Hafdís Sigurgeirsdóttir og Ólöf Helga Þór stjórnuðu inntökuathöfn nýrrar félagskonu, Eddu Gíslrúnar Kjartansdóttur. Inntökuathöfninni lauk með hópsöng deildarinnar Vorvindar glaðir.

3. Næst gerði ritnefnd Eta deildar (Auður Torfadóttir, Bryndís Guðmunds-dóttir og Ólöf Helga Þór) grein fyrir ritstörfum sínum sem fólust í að skrá „Sögu Eta deildar“  í 50 ára afmælisrit Delta Kappa Gamma. Á fundinum las ritnefndin textann upp fyrir félagskonur og þar kom mjög margt fróðlegt og skemmtilegt fram úr sögu deildarinnar. Þetta mun verða hægt að skoða þegar afmælisritið kemur út, líklega á haustmánuðum.

4. Kvöldverður: Í boði var ljúffengur fiskur og meðlæti að hætti hússins.

5. Að loknum kvöldverði var haft nafnakall og sögðu félagskonur jafnframt frá því hvenær þær hefðu gengið í félagið.

6. Að efla innbyrðis kynni Eta systra. Í fundarboðinu voru Eta systur beðnar um að taka með á fundinn hlut/mynd sem hefði merkingu fyrir þær og áttu þær síðan að deila sögu hlutarins/myndarinnar með borðfélögum. Á fundinum var systrunum síðan skipt í 5 manna hópa og deildu þær sögu hlutar/myndar sem þær höfðu með sér og hafði tilfinningalegt gildi fyrir þær. Þetta vakti mikla ánægju og fannst systrunum sem þær hefðu kynnst enn betur.

7. Fundinum var síðan slitið rúmlega átta.