Íslenski námsstyrkjasjóðurinn

Meginhlutverk sjóðsins er að styrkja félagskonur í Delta Kappa Gamma á Íslandi sem vinna að lokaverkefnum í meistara- og doktorsnámi eða öðru sambærilegu framhaldsnámi.

  1. Námsstyrkjasjóður heyrir beint undir stjórn landssambands Delta Kappa Gamma á Íslandi. Einn styrkur er veittur annað hvert ár, það ár sem landssambandsþing er haldið. Stjórn ákveður hvaða upphæð kemur til úthlutunar hverju sinni og tilkynnir úthlutunarnefnd um það.
  2. Á tveggja ára fresti, þegar kosin er ný landssambandsstjórn í samtökunum, eru þrjár konur skipaðar í úthlutunarnefnd, svokallaða námsstyrkjasjóðsnefnd.
  3. Stjórn landsambandsins ber ábyrgð á að auglýsa úthlutun úr sjóðnum. Styrkir eru að jafnaði auglýstir í haustblaði Fréttablaðs Delta Kappa Gamma og á heimasíðu samtakanna. Jafnframt eru formenn deilda beðnir um að vekja athygli á auglýsingunni meðal félaga.
  4. Umsóknarfrestur um styrk er til og með 1. mars. Úthlutunarnefnd skal að jafnaði hafa lokið störfum einum mánuði síðar og tilkynna landssambandsstjórn þá þegar um tillögur sínar með bréfi undirrituðu af nefndarmönnum.
  5. Einungis félagar í Delta Kappa Gamma á Íslandi geta sótt um styrk.
  6. Styrk má veita til eftirfarandi verkefna:
    1. Vegna vinnu við meistaraprófs- og/eða doktorsverkefni og skal umsækjandi sýna fram á að verkefnið sé komið vel á veg. Styrkinn má einnig nota til kynningar á slíku verkefni sé því nýlokið.
    2. Vegna verkefna í sambærilegu framhaldsnámi og skal umsækjandi sýna fram á að verkefnið sé komið vel á veg. Styrkinn má einnig nota til kynningar á slíku verkefni sé því nýlokið.
  7. Þegar velja þarf milli umsækjenda sem uppfylla skilyrði skal, m.a. tekið tillit til virkni umsækjenda í samtökunum og  þess hversu lengi hann hefur verið félagi.
  8. Styrkurinn er afhentur á landssambandsþingi.
  9. Ári eftir að styrkur er veittur, að jafnaði fyrir næsta landssambandsþing, skal styrkþegi, með stuttri greinargerð, gera stjórn grein fyrir hvernig hann nýtti styrkinn.
  10. Komi upp ágreiningur innan námsstyrkjanefndar vegna úthlutunar, skal honum vísað til landssambandsstjórnar.

Þannig samþykkt af stjórn landssambands
Delta Kappa Gamma á Íslandi
6. nóvember 2006

 

Nánari upplýsingar, reglur sjóðsins og umsóknareyðublað má nálgast hjá formanni námsstyrkjasjóðsnefndar, Ágústu Guðmundsdóttur í Alfadeild, sími 551-1168/899-1168, netfang:  ag@hi.is . Einnig má nálgast umsóknareyðublaðið með því að smella á krækjuna hér að ofan.

Umsóknir skulu sendar til formanns nefndarinnar fyrir 1. mars á úthlutunarári eins og segir í reglunum hér að ofan.


Síðast uppfært 15. apr 2017