Góðir hlutir gerast

Á þessari síðu eru dæmi um ýmis góð verkefni sem Delta Kappa Gamma systur hafa unnið að eða tekið þátt í. Frekari ábendingar um verkefni sem hér ættu heima sendist til vefstjóra (eyglob@unak.is).


Í nóvember 2011 kom út hjá RIKK og Háskólaútgáfunni bókin Á rauðum sokkum: baráttukonur segja frá. Í bókinni segja tólf konur frá starfi sínu með Rauðsokkahreyfingunni fyrstu ár hennar en haustið 2010 voru liðin 40 ár frá eiginlegum stofnfundi hreyfingarinnar árið 1970. 

Meðal höfunda bókarinnar er ein kona úr Etadeild, Elísabet Gunnarsdóttir, og tvær konur úr Gammadeild, þær Gerður G. Óskarsdóttir og Vilborg Dagbjartsdóttir sem rita sinn kaflann hver.  Jafnframt leggur Vilborg, sem er einn af frumkvöðlum Rauðsokkahreyfingarinnar, bókinni til tólf ljóð sem flest voru ort á áttunda áratugnum og eiga ríkan samhljóm með umfjöllunarefni frásagnanna.
 

Tungumálatorg
Á Degi íslenskarar tungu 16. nóvember 2010 var opnað Tungumálatorg á Menntavísindasviði Háskóla Íslands. Etasystir okkar Brynhildur Anna Ragnarsdóttir kynnti verkefnið ásamt Þorbjörgu St. Þorsteinsdóttur. Þær hafa átt veg og vanda að undirbúningi þess og fjölluðu um þróun þess og ávinning.

Markmið Tungumálatorgsins er að styðja við nám og kennslu tungumála og fjölmenningarlegt skólastarf með upplýsingamiðlun, ráðgjöf og samskiptum um netið. Vettvangurinn hefur þýðingu fyrir fjölmenna hópa tungumálakennara, skólastjórnenda, foreldra og nemenda. Tungumálatorgið er ætlað öllum skólastigum og fullorðinsfræðslu.


Upplestrarkeppnin
Eitt af þeim verkefnum sem DKG konur koma að er  „Stóra upplestrarkeppnin“ en Ingibjörg Einarsdóttir í Gammadeild er ein af frumkvöðlum þessa verkefnis og stýrir því um allt land. Börn sem tekið hafa þátt í þessari keppni lásu upp Passíusálmana í Hallgrímskirkju á föstudaginn langa árið 2005 og aftur árið 2010.

Viðbót í janúar 2013: Þess má geta að á nýársdag 2013 var Ingibjörg sæmd heiðursmerki hinnar íslensku fálkaorðu fyrir framlag til eflingar á lestrarhæfni grunnskólanema.


 

Í tengslum við 30 ára afmæli samtakanna var ráðist í að gefa út mjög glæsilegt og veglegt afmælisrit með greinum um uppeldis- og fræðslumál eftir félagskonur. Þetta fallega og fróðlega rit má nálgast með því að senda tölvupóst til Guðbjargar Sveinsdóttur gjaldkera landssambandsins og tilgreina hversu mörgum eintökum óskað er eftir. Guðbjörg hefur netfangið gudbjorg.sveinsdottir@reykjanesbaer.is . Einnig þarf að greiða fyrir ritið með því að leggja inn á reikning samtakanna sem er : 546-26-2379 og kennitala: 491095-2379.  Ritið kostar 3000 krónur. Um leið og greiðsla fyrir pöntunina hefur borist mun ritið verða sent viðkomandi.

Skoðaðu efnisyfirlitið og tryggðu þér eintak.

Hægt er að skoða ritið á baekur.is, vef Landsbókasafns Íslands – Háskólabókasafns.


Síðast uppfært 15. apr 2017