Fréttir

Fundur var haldinn í Epsilondeild laugardaginn 16. nóvember 2013 í Vatnsholti í Flóa. Sigrún Jóhannesdóttir úr Deltadeild kom á fundinn og kynnti fyrir okkur námskeið um markmið og leiðir til að efla innra starf deilda sem hún hefur þróað og nefnir Delta Kappa Gamma stjarnan eða „Leiðarstjarnan.“ Við byrjuðum á að ræða saman í litlum hópum hvernig við vildum hafa fundina ef við breyttum einhverju en vorum sammála um að við værum frekar ánægðar með okkar starf.

Í gær var tæknin eilítið að stríða okkur þannig að fréttabréfið í heppilegri útgáfu til að lesa beint á vefnum var ekki í lagi. Nú erum við búnar „að ná tökum á tækninni“ og ekkert því til fyrirstöðu að lesa fréttablaðið beint á vef. Vonum að þið njótið :-) http://dkg.muna.is/static/files/skjol_landsamband/utgafa_blod_frettabref/frettabref_haust_2013.pdf

Nú er hausteintakið af fréttabréfinu okkar 2013 komið á vefinn, stútfullt af efni. Það má skoða beint á vefnum en einnig er þar prentvæn útgáfa sem hentar til að prenta út fyrir þær sem ekki hafa aðgang að vefnum. Við óskum nýju ritnefndinni til hamingju með flott fréttabréf :-)

Dagbjört Ásgeirsdóttir í Mýdeild er að senda frá sér sína þriðju barnabók nú fyrir jólin. Bókin sem ber heitið Gummi fer í fjöruferð er gefin út af Óðinsauga útgáfu. Bókin er sjálfstætt framhald fyrri bóka Dagbjartar; Gummi fer á veiðar með afa og Gummi og dvergurinn úrilli. Við óskum Dagbjörtu innilega til hamingju með bókina.

Þetadeild sem staðsett er á Suðurnesjum er 15 ára í dag, en hún var stofnuð 26. nóvember 1998. Við óskum deildinni til hamingju með afmælið :-)

Kristín Jónsdóttir í Gammadeild situr í alþjóðlegu nefndinni, Membership Committee. Annan hvern mánuð gefur nefndin út lítið fréttabréf sem ber heitið Membership Memo. Í síðasta tölublaði (nóv/des) skrifaði Kristín grein í blaðið um stofnun nýrra deilda.

Í tilefni af Degi íslenskrar tungu afhenti Guðrún Kvaran, formaður Íslenskrar málnefndar, Kristínu Jóhannesdóttur í Alfadeild viðurkenningu. Viðurkenningin var afhent á málræktarþingi Íslenskrar málnefndar sem haldið var fimmtudaginn 14. nóvember 2013 í bókasal Þjóðmenningarhússins við Hverfisgötu en þema þess var Íslenska sem annað mál og börn með erlendan bakgrunn í íslensku skólakerfi​.

Þær Iotasystur stóðu fyrir ráðstefnunni „Á flekamótum“ í lok október. Ráðstefnan var vel heppnuð og við gefum þeim Iotasystrum orðið:

Aðalheiður Skarphéðinsdóttir félagi í Lambdadeild, grafíklistakona og myndlistarkennari var einnig að gefa út bók á dögunum í félagi við eiginmann sinn. Bókin er ljóðabók fyrir börn og heitir Ljúflingsljóð. Lárus Jón Guðmundsson eiginmaður Aðalheiðar orti ljóðin og Aðalheiður myndskreytti. Hægt er að skoða sýnishorn úr bókinni á vefnum. Við óskum þeim til hamingju með bókina!

Á Evrópuráðstefnunni í Amsterdam síðastliðið sumar fengum við kynningu á verkefni sem verið er að vinna hjá DKG í Eistlandi. Margarita Hanschmidt fyrrverandi landssambandsforseti DKG í Eistlandi er í forsvari fyrir þessu verkefni sem felst í því að virkja atvinnulausar rússneskar konur sem búa í Eistlandi en eru í raun utan við samfélagið þar sem þær tala ekki eistnesku og hafa litla tekjumöguleika. En þessar konur eru mjög handlagnar og Margarita kom með nokkrar rósir sem þær höfðu saumað. Við vorum þó nokkrar sem keyptum rósir af henni í Amsterdam.