Fréttir

Þeta-systur brugðu undir sig betri fætinum s.l. fimmtudag og skelltu sér saman í leikhús. Fyrir valinu varð leikritið Þrettándagleðin eftir William Shakespeare sem sýnt er í Þjóðleikhúsinu. Leikendur eru bæði úr hópi reyndra leikara hússins og útskriftarhóps  Leiklistarskólans. Skemmst er frá því að segja að sýningin var bráðskemmtileg, leikmynd og búningar einfalt og snjall, margir efnilegir leikarar úr hópi nemanna og þeir reyndu stóðu allir vel fyrir sínu. Fyrir sýningu fór hópurinn saman út að borða á Hótel 101 og getur sannarlega mælt með þeim veitingarstað.

Þeta-systur fengu skemmtilega innsýn í sýningarhönnun á fundi sínum í Duus-húsum í gærkvöldi. Þar fengum við að kynnast hugmyndafræðinni sem býr að baki hönnunar nýrrar sýningar Byggðasafns Reykjanesbæjar sem verið er að setja upp í Gryfjunni. Sýningin nefnist Völlurinn og er um störf Íslendinga á Keflavíkurflugvelli og áhrif veru hersins á mannlífið á Suðurnesjum. Sigrún Ásta, forstöðumaður safnsins og Björn G. Björnsson, sýningarhönnuður sögðu frá og nýjar hugmyndir kviknuðu í umræðunni. Enginn vafi er á því að þarna verður á ferð áhugaverð sýning.

Hinn árlegi bókafundur Þeta-systra var haldinn í gærkvöldi. Sem betur fer sláum við ekki slöku við lesturinn frekar en fyrri daginn og kynntar voru 22 bækur á fundinum. Fundurinn var haldinn á heimili gjaldkera deildarinnar, Guðbjargar Sveinsdóttur og bauð hún til glæsilegs kaffiborðs í lok fundar. Bókafundir eru í miklu uppáhaldi hjá Þeta-systrum og vill engin okkar breyta út af þeirri venju að koma saman og deilda góðum bókum með öðrum systrum.

Miðvikudaginn 26. nóvember s.l. voru liðin 10 ára frá stofnun Þetadeildar Delta Kappa Gamma á Suðurnesjum. Þessara tímamóta var minnst með glæsilegum afmælisfundi sem haldinn var heima hjá formanninum okkar, Valgerði Guðmundsdóttur. Stjórn deildarinnar sá um að útbúa veisluborð með heitum og köldum réttum og voru félagar á einu máli að vel hafi til tekist. Þema fundarins var tónlist og í tilefni af því kom ungur nemandi úr Tónlistarskóla Reykjanesbæjar til okkar og lék á píanó. Guðný Helgadóttir og Ingibjörg Einarsdóttir úr stjórn landssambandsins voru gestir fundarins. Nánar má lesa um fundinn í fundargerð afmælisfundarins.

Ný stjórn Þetadeildar var kosin á vorfundi deildarinnar í maí s.l.